Գլխավոր | Լուրեր | Ի՞նչ նորամուծություններ կան պացիենտների առաջարկներին արձագանքելու հարցում

Շրջայցերի, հանդիպումների ընթացքում պացիենտները բազմաթիվ հարցեր էին բարձրացնում, որոնք հնարավորության դեպքում իրականացվում էին ․ մեկ բուժառուի նկարագրից, երբեմն փոխվել է ամբողջ սննդակարգը, սննդի մատուցման հաճախականությունը, տեսականին:

Աշխատանքների իրականացման ընթացքում պարզ դարձավ, որ 9 բաժանմունքների պացիենտների հետ անընդհատ շփումը հնարավոր չէ, և  որոշվեց օգտագործել փակ արկղեր՝ «նամակ տնօրենին» գրվածքով: Պացիենտները կարող են գրել և արկղի մեջ գցել իրենց առաջարկները, դժգոհությունները։ Առաքիչը, ով բաժանմունքների աշխատակազմից չէ, օրը մեկ անգամ բացում է արկղերը, և ուղիղ փոխանցում է տնօրենին։

Նորամուծությունն «աշխատեց», պացիենտները խնդիրներ են բարձրացնում, որոնք ի շահ իրենց են լուծվում:

Առողջապահության նախարարությունը՝ օրենքի պահանջներից ելնելով, որոշեց յուրաքանչյուր բաժանմունքում Հայփոստի արկղ տեղադրել, որպեսզի պացիենտները հնարավորություն ունենան կապ ունենալ նաև արտաքին աշխարհի հետ, նամակ գրել, օրինակ՝ նախարարություն, դատարան և այլն: Եվ այդ նամակներն, առանց  բացվելու, ուղարկվում են:

Որոշում կայացվեց նաև, որ առավոտյան ժամը 9-ից մինչև 21։00 պացիենտները, հեռախոսի առկայության դեպքում, հնարավորություն ունենան օգտվել այդ հեռախոսներից առանց սահմանափակման: Ըստ օրենքի, բուժառույին թույլատրվում է ամիսը 3 անգամ մի քանի րոպե հեռախոսային խոսակցություն ունենալ:

Սա իրականացնելու համար տեղադրվել են գրասեղանային բջջային հեռախոսներ, Յուքոմ ընկերության կողմից տրամադրված քարտեր, և պացիենտները հնարավորություն ունեն զանգեր կատարել ցանկացած ուղղությամբ՝ առանց սահմանափակումների: Հեռախոսների մոտ պատին փակցված են կարևոր հեռախոսահամարներիի ցանկը՝ ոստիկանություն, նախարարության թեժ գիծ, մարդու իրավունքների պաշտպան և պացիենտները ազատ են իրենց որոշման մեջ՝ ուր զանգել և ինչ հարցերով դիմել։ Սա, իսկապես, անհրաժեշտ փոփոխություն էր, բայց և դժվար իրականացված:

Կարևոր է, որ պացիենտները հավատան և վստահեն մեզ, դա կօգնի, որպեսզի նրանց այստեղ գտնվելը արդյունավետ լինի: